الحب .. جزء 2

وحشني اوي الاحساس ده ...
على قد بساطة الكلمة دي على قد ما بتدي فرحة كبيرة اوي اوي وكمان بتدي جرح كبير اوي ...
.. لا مش اوي لأن دي في الاول والآخر نصيب وقدر من الله ...
بمعنى .. لو ليك نصيب في حد بتحبه هيكون لك مهما الدنيا عارضتك ولو ملكش نصيب فيه مش هتنوله مهما عملت .. من الآخر كده ... اللي ربنا عايزه هو اللي هيكون ولازم ترضى باللي يتقسملك لأنه اكيد اكيد خير ليك ..

طب هو ايه معنى الحب اصلا ً ؟؟!
الحب عبارة عن شوية مشاعر واحاسيس تجاه شخص معين .. بتحس انك نفسك تعمله اي حاجة عشان تشوفه دايما ً مبسوط وسعيد .. وتزعل لما تلاقيه حزين .. وتتخانق مع الدنيا كلها لو زعلته .. بتحس انه مالي حياتك ومن غيره الدنيا لا تسوى شيئ .. ومهما تتخانقوا مش بتقدروا تتفارقوا .. وبتدعي ربنا يقربه اكتر منك ويفضل معاك ويكون نصيبك ..
من الآخر هو حاجة غريبة كده بس احساسها حلو اوي ومطلوبة ... هو ده معنى الحب الحقيقي
مش حب اليومين دول اللي مبني على المصلحة .. مش حب المال والجاه .. مش حب الشخص عشان مركزه او ابن عيلة فلان .. حاجات كده ملهاش ادني علاقة بالحب الطاهر النقى .

Abdou Eweea

اعمل اهبل !!

كتير مننا في كليات ومدارس مخنوقين من بعض الدكاترة والاساتذة ونفسهم لو يمسكوهم ويطلعوا عليهم القرف اللي بيشوفوه منهم.
انا لقيت حل جنوني جدا من الدرجة الاولي  .. اعمل اهبل !!
الوصفة سهلة كل المطلوب منك زيارة بسيطة لعنبر المجانين عشان تتعلم تتصرف زيهم وواحد تثق فيه تفهمه الليلة كلها عشان يبقى معاك على الخط
لما يدخل الهدف - قصدي الدكتور - المحاضرة  ويشرح شوية امسك دماغك اكنك عندك صداع .. شوية كده واشنغل آهات بقى وعلّي صوتك وكده .. ساعتها الدكتور هيوقف المحاضرة ويجيلك ويسألك فيه ايه يا ابني؟ اوعى ترد عليه .. في اللحظة دي استغل فرصة انه قريب منك واتحول لاهبل .. طلع لسانك , اتنطط , اقف على الكرسي وتروح جاي مرة واحده ناطط عليه -زي العيل الصغير- وحاول توقعه على الارض لحد اما يقع وبعد كده بقى انت وذوقك في التظبيط .. شوية تلطيش على الوش او القفا على كام شلوت ما انت اهبل ومحدش هيدق على اللي بتعمله
طبعا وكل ده بيحصل صاحبك شغال معاك برضه : معلش يا دكتور اصله تعبان , اصله عنده مرض في دماغه وكده بقى
ملحوظة صغيرة: اللي ناوي ياخد بكلامي وينفذه انا مش مسئول عنه

+18

انا عارف ان مقال زي ده بالعنوان ده ممكن يهز صورتي قدام زمايلي وممكن يفكروا فيا كمان بطريقة وحشة .. بس انا لازم اعذرهم لان التفكير مش ذنبهم ده ذنب المجتمع الغبي اللي احنا عايشين فيه .. مجتمع تفكيره سطحي بيبص على المظاهر مش الجوهر .. لوحبيت اتكلم عن موضوع للكبار فقط او +18 يبقى انا عملت جريمة مخلة بالشرف .. مجرد توضيح : مش اي موضوع للكبار فقط يبقى حاجة قبيحة ممكن جدا يبقى موضوع مفيد جدا بس خاص للكبار الناضجين فكريا .. وعلى هذا الاساس قررت اعدي الخطوط الحمرا اللي المجتمع عملها على عقولنا ..
قبل ما ادخل المدرسة الثانوية كنت قطة مغمضة بكل ما تحمله الكلمة من معني معنديش اي ثقافة عن الحياة غير الدراسة وبس لحد ما دخلت المرحلة الثانوية في احدي المدارس الحكومية .. فوجئت بمصطلحات غريبة عليا وكان في سؤال مشهور اوي في الفصل .. انت بلغت ولا لسه؟ .. طبعا مقدرتش اجاوب على السؤال ده لاني مكنتش فاهم يعني ايه كلمة بلغت .. بس بعد كده عرفت واتعلمت الثقافة دي بس على يد الفشلة والساقطين ونتيجة لكده وقعت في غلطات بشعة ربنا يغفر لي و يسامحني بقى
اللي حصل ده بسبب عدم الاهتمام والتوعية من الوالدين للمراهقين بموضوع الثقافة الجنسية .. طبعا انا مش قصدي ان يجي الاب مع ابنه ويفرجه على فيلم اباحي ويفتحله موقع مخل ويقوله اتعلم .. اللي اقصده انه يعلم ابنه او بنته ان في مواد زي دي موجوده وسببها ايه وفايدتها او ضررها .. لما اقرأ عنوان في جورنال ما ان في احصائية اتعملت على الشباب ووجد ان اكتر من 95% من الشباب يمارسون العاده السرية حد ممكن يقولي ده معناه ايه؟؟
هي دي بقى المنطقة المحظورة اللي المجتمع بيتكسف يدخل فيها .. لما تسمع خبر زي ده تلاقي حد يقولك دي عيال صايعة مش متربية .. طبعا عنده حق ومين يعني اللي هيعلمه ويربيه اذا كانت المواد دي بقت خلاص عاديه في اي بيت .. بوستين على حضنين على .... ويبقى فيلم بورنو على حق والعيلة متجمعة وبتتفرج عادي .. خلاص مفيش حياء ولاخشي
كل اللي بيحصل ده سببه الاساسي بعدنا عن ربنا وعن ديننا بالاضافة الي عدم التربية السوية والتوعية من الاهالي
لكن اللي انكسر يتصلح .. لو كل واحد حافظ على الصوات الخمسة يبقى كده اضمن له الطريق السليم
نصيحة اخيرة .. ياريت نقدر نعلم ولادنا ونربيهم كويس عشان ما يقعوش في اللي وقعنا فيه
اللهم اصلح شأننا وطهر قلوبنا واهدنا الى طريقك المستقيم
اللهم امين ...

الحب

الحب ..

 يعني ايه الكلمة دي؟  وازاي الواحد يحب ؟ وايه اللي بيحصل لما بنحب؟

كل دي اسئلة جت في بالنا في اول مرة سمعنا فيها الكلمة دي .. سمعناها كتير اوي الافلام والمسلسلات

لكن لما كبرنا وبدأنا نستوعب المفاهيم الاجتماعية للمجتمع فهمنا الكلمة دي  وحسيناها

من صغرنا واحنا بنحب .. حبينا اهلنا .. حبينا اقاربنا .. حبينا اصحابنا

لكن في حب اول ما تحس بيه يسيطر عليك وعلى عواطفك وتفكيرك .. بسميه حب من طراز خاص

ممكن تعمل اي حاجة عشان اللي بتحبه ده .. تلاقي البنت مثلا ممكن تحب واحد فقير وترضى تعيش في المستوى ده وتلاقى الولد اللي بيحب يتقلب شاعر قدام حبيبته .. صحيح  كما قيل : الحب يصنع المعجزات

يا تري ليه ؟

هاجاوبكم المرة اللي جاية

بس احب اسمع آرائكم